Кривичниот суд во Скопје на 23 јануари 2025 година ја прекина постапката против Трајко Вељаноски, Миле Јанакиески, Спиро Ристовски и Владимир Атанасовски, обвинети во случајот „Организатори на 27 април“. Судот ја уважи амнестијата предвидена со Законот за амнестија донесен во 2018 година, со што на обвинетите им беше дозволено да ја напуштат судницата како слободни граѓани.
На обвинетите им се судеше за организирање на насилниот упад во Собранието на 27 април 2017 година. Тие беа обвинети за кривично дело терористичко загрозување на уставниот поредок, при што беа посочени како организатори на протестите што кулминираа со насилството во парламентот.
Обвинителството за гонење на организиран криминал и корупција не поднесе жалба на пресудата за запирање на постапката. Според судот, постапките на обвинетите биле опфатени со Законот за амнестија, со кој беа амнестирани лица кои учествувале во настаните од 27 април.
Во јавноста, барања се упатија кон Јавното обвинителство за да продолжи со истрагата за вистинските организатори на настаните од 27 април, со образложение дека останува неопходно да се утврди кој го подготвил и го извршил организирањето на упадот. Стојко Апостолски, пратеник и учесник во Собранието за време на нападот, изјави дека настаните претставуваат тешко дело против државата и побара целосно истражување.
Законот за амнестија од 2018 година беше усвоен со цел политичко помирување, но неговата примена на овој случај повторно го активира прашањето за одговорноста на лицата инволвирани во организирањето на настаните.
Обвинетите и нивната одбрана изјавија дека судењето било политички мотивирано и дека тие постапувале согласно нивните службени должности. Со одлуката на судот, Вељаноски, Јанакиески, Ристовски и Атанасовски се ослободени од одговорност за случајот.