Издавачката куќа “Галимар” во Франција денеска го претстави своето ново издание на збирката раскази “Не одам никаде” (Je ne bouge pas d’ici) од македонската писателка и универзитетска професорка Румена Бужаровска, преведена од Марија Бежановска.
Ова е втората книга на Бужаровска објавена кај ова престижно француско издавачство, по нејзиниот роман “Мојот маж” кој беше претходно издаден.
Издавачката куќа “Галимар” е една од највлијателните издавачки куќи во дваесеттиот век, која го објави делото на познати автори како Марсел Пруст, Жан Пол Сартр и Албер Ками. Со издавањето на книги од добитници на Нобеловата награда за книжевност и современи писатели, “Галимар” продолжува да ги запознава француските читатели со различни литературни дела.
По успешното издавање во САД, Турција, Унгарија, Србија, Хрватска, Словенија, Босна и Херцеговина и Франција, збирката “Не одам никаде” наскоро ќе биде преведена и на шпански јазик во издание на “Импедимента”. Исто така, романот “Мојот маж” на Румена Бужаровска ќе биде достапен и за читателите во Бразил, во издание на “Тодавиа”.
Македонските читатели веќе имаат можност да уживаат во второто издание на нејзиниот прв роман, “Тони”, чија карикатуралност ќе ги насмее и натера на размислање за личната одговорност, тема која е многу актуелна денес.