Основните и средните училишта во повеќето општини во северниот дел на Грција денес ќе бидат затворени поради снежната бура која ја зафати регионот во последните денови.
Според дописничката на МИА од Атина, сообраќајот за тешки возила е забранет на одредени патни правци.
Научната комисија за проценка на кризни ситуации при Министерството за климатски промени и цивилна заштита одржа вонреден состанок вчера и препорача забрана на сообраќајот на тешки возила до 14 часот на одредени делници во Северна Грција. Исто така, е задолжително користењето на ланци за автомобилите на патиштата во регионите Епир, Северна Грција, Тракија и западниот дел на Тесалија.
На север, температурите се движат од -4 до 3 степени Целзиусови со обилни снежни врнежи, додека во јужниот дел на континентална Грција паѓа засилен дожд. Наспроти тоа, на островот Крит владее топло време со температури од 18 до 19 степени Целзиусови.