Сè уште нема пријавени случаи на труење со парацетамол поради TikTok предизвикот, но здравствените власти предупредуваат за сериозните ризици од ваквите постапки.
Докторот Беќаровски апелира до родителите да ги надгледуваат своите деца пред да се случи некоја трагедија.
Според Беќаровски, труењата со парацетамол спаѓаат меѓу најопасните труења со лекови. Дури и мали дози од 10-15 таблети можат да предизвикаат оштетување на црниот дроб. Поголеми дози од 20-40 таблети можат да доведат до сериозни труења и повреди, додека внесувањето на повеќе од 50 таблети често завршува фатално. Тој истакнува дека, дури и со интензивен медицински третман, овие труења можат да бидат смртоносни.
Министерот за здравство, Арбен Таравари, изјави дека сè уште нема информации за пациенти на Клиниката за токсикологија поврзани со овој предизвик. Сепак, тој го нагласи значењето на родителскиот надзор и потребата да се спречат младите од вакви опасни активности.
Во случај на труење, Беќаровски препорачува веднаш да се дадат 10 таблети медицински јаглен и 2 кесички АЦЦ, а потоа веднаш да се побара итна медицинска помош. Тој нагласува дека секоја секунда може да значи разлика меѓу спасен или загубен млад живот.
Пред неколку дена, здравствените власти во Швајцарија исто така издадоа предупредување за ризиците од овој предизвик и ги повикаа аптеките да бидат поопрезни при продажбата на парацетамол на младите.